میانا روستای نخبگان و دانش پژوهان

شعری زیبا از استاد رحمت الله حسن پور که به ما توصیه می کند که هیچ وقت گذشته و اصل خود را فراموش نکنیم.

نَمبه فارسی نَخِشه؛تِه شِه زِبون رِه یاد نکن

مازرونه وَچوئی؛مازندرونِ یاد نَکِن

هر کِجه دَری دووش٬خدا تِه پِشتی گِر بوشه

خَله بالا که شونی٬شِه نردبونه یاد نَکِن

اون قدیما گتنه زن وَرنی٬زن مارِ هارِش

گِل برار وچوئی٬مشتی گلونِ یاد نَکِن

هرکی کار داشته تِره مردِ واری جواب هاده

گَته مردی که بَیی خورده وچون یاد نَکِن

تِره نَمبه که دیگه شیرنی دانمارکی نَخِر

نوش جان بوه تره٬تَندیرِ نون یاد نکن

تَش و تَندیر و هیمه مردم نون ره پَتِنه

اگه فِر دارنی اِسا هیمه کَرون ره یاد نکن

تِه ۲تا جیف اگه مَشته خانی چک پول بییری

بانک سرمایه شونی اَتا قِرون یاد نکن

تِه که هر سال شونی مکه٬خِرو خِش حاجی وونی

اتا وشنا ره بَدی بی آب و نونِ یاد نکن

خانی لَس لَس هِنیشی گپ بزنی شهر دِله

برج میلادِ بدی٬شِه دم زنونِ یاد نکن

تِه اگر چاشت گِدِر٬شوم گِدِر خِرنی پِلا

شه پَلی شوپه گِرو بینج کرون یاد نکن

اگه اینترنت پِشتی همه جا پیغوم دِنی

تلفن هِندلی و نامه رسون یاد نکن

اتا گِل خانی بوری یلاق او ره بخری

بوردی مه جان سوادکوه کاکرونِ یاد نکن

ته فریزر اگه مشته٬خانی کیوی بخری

اتا مردی که بیه ته باغبونِ یاد نکن

گنه اکسیرِ محبت٬همه جا پیدا نَنه

اُنس و اُلفت که دَره اَمه میونِ یاد نکن

اتا آدم که تِوِسه شعر مادری گِنه

مرسی مرسی باووتی٬خِنابدونِ یاد نکن